Vieiros

Como cada 17 de marzo, os irlandeses de todo o mundo celebran o día do seu patrón, San Patricio, ou Naomh Pádraig, en gaélico irlandés. Pero Patricio non é só o patrón de Irlanda, senón tamén de Nixeria, cristianizada por misioneiros irlandeses, e da illa caribeña de Montserrat, que ten no seu escudo a famosa arpa da illa británica.

Unha das principais comunidades irlandesas está nos EUA, concretamente na cidade de Nova York. Cada 17 de marzo, o seu edificio máis emblemático, o Empire State Building, ilumínase de verde para conmemorar a festividade de San Patricio, e este ano volverá ser así.

Curiosamente, aínda que a cor verde sexa a que se identifica habitualmente con Irlanda, o certo é que o seu patrón ten como cor "oficial" un ton de azul, o azul San Patricio. O verde viría doutro dos símbolos de Irlanda: o trevo, que o santo usou para simbolizar a Santísima Trindade.

Pero a principal novidade é que este ano San Patricio non se celebrou en Irlanda o día 17. A igrexa católica irlandesa trasladou a festividade ao sábado 15 para non coincidir coa Semana Santa, que ocupa un rango superior nas conmemoracións relixiosas, para evitar interferencias.

En Galiza, os paralelismos que existen con Irlanda por todo o relacionado coa mitoloxía céltica fan que a xornada deste luns se celebre tamén dun xeito especial. Porén, non hai grandes e masivas manifestacións públicas, senón que as celebracións se fan de xeito máis privado: en pubs de ambientación irlandesa, consumindo cervexa dese país e escoitando música folc de Irlanda.