Vieiros

Os tres principais acusados de complicidade no xuízo organizado en Moscova polo asasinato da xornalista rusa Anna Politkovskaya foron absoltos polo xurado nun veredicto que apelará a fiscalía, segundo informan as axencias internacionais.

Trátase dos irmáns chechenos Yibrail e Ibraguim Majmudov, sospeitosos de vixiar os desprazamentos da xornalista e de levar ao lugar do crime o suposto autor material do asasinato, o seu irmán Rustam, que nunca foi detido.

O ex policía Sergei Jayikurbanov, sospeitoso de organizar a loxística para o asasinato, tamén resultou absolto, do mesmo xeito que un ex axente do FSB (servizos de intelixencia), Pavel Riaguzov, que comparecía por acusacións de extorsión e abuso de poder, mais non vinculado directamente co asasinato.

Logo de tres meses de proceso, o xurado unicamente recoñeceu unha única evidencia: que Politkovskaya foi asasinada. Os seu fillos escoitaron en silencio o veredicto e a súa avogada denunciou de novo que a investigación non lograse resolver o crime de outubro de 2006.

Reaccións
Varias organización e gobernos, entre estes Amnistía Internacional e Estados Unidos, sumáronse esta quinta feira ás petición para lograr o esclarecemento do caso.

"Lamentamos que o seu asasinato non se resolvese", declarou á prensa o portavoz do Departamento de Estado, Gordon Duguid. "Chamamos a Rusia a seguir buscando os responsables e a os levar ante a Xustiza o máis rapidamente posible", agregou.