Vieiros

Esta sexta feira os axentes da Brigada Provincial de Estranxeiría Documentación e Fronteiras da Coruña arrestaron a tres empresarios da zona da Noia, que se dedican aos sectores da construción e a hostalaría. Estes tres novos detidos únense a outras tres persoas arrestadas entre a cuarta e a quinta feira en Compostela e o Milladoiro. Dous deles eran empresarios, e un terceiro traballador do Centro de Información a Traballadores Estranxeiros (CITE) de Comisión Obreiras (CCOO) en Compostela.

Os seis detidos estarían supostamente relacionadas cunha trama de tráfico de persoas inmigrantes, sobre todo cidadáns marroquís, aos que lles cobrarían por darlles traballo en empresas galegas. De momento, a investigación continúa aberta e a policía española anda na procura de novos documentos laborais que probarían a relación das persoas supostamente explotadas con estas empresas. Os axentes atopáronse cunha trama moito máis ampla e estendida do que se pensou nun comezo, de aí que os rexistros e detencións poidan continuar nos vindeiros días.

CCOO xa fixo pública a súa intención de persoarse como acusación particular na causa, e o seu secretario xeral, Xan María Castro, pediu que os feitos se esclarezan canto antes. Dende o sindicato insisten, ademais, que o único implicado no caso é o traballador do CITE, e insisten en que a central non ten ningunha relación coas actividades que puidese estar realizando este sindicalista dende o seu posto de traballo.