Vieiros

Australia vén de anunciar que a vindeira semana iniciará accións legais para que Xapón cese na matanza de centos de baleas por ano, alegando motivos científicos. O goberno australiano, que xa pediu varias veces a suspensión destas actividades pola vía diplomática, levará ao goberno xaponés até o Tribunal Internacional de Xustiza da Haia.

O ministro australiano anunciou a decisión, que cualificou de “difícil” apelando a motivos científicos: “queremos suspender a caza da balea no nome da ciencia na Antártida”, dixo. Mentres, a reacción non se fixo agardar en Tokio. Xapón defendeu a legalidade do seu programa e cualificou de “moi lamentábel” o intento australiano de abolir esta actividade.