Vieiros

"Estamos aquí porque amamos este país demasiado como para permitir que os vindeiros catro anos sexan igual ca os últimos oito". Diante dunhas 75 mil persoas que o aclamaban esta quinta feira en Denver (EUA), Barack Obama escenificou o espírito de "cambio" co que o Partido Demócrata afronta a campaña electoral.

Obama converteuse oficialmente no primeiro home afroamericano que opta a presidir o país máis poderoso do mundo. No seu discurso de aceptación da candidatura, que culmina a convención do Partido Demócrata, o senador de Illinois criticou a "política errática" de George W. Bush.

"O 4 de novembro (día da votación) témonos que erguer e dicir: 'Oito anos son dabondo'", sinalou Obama, e engadiu que "John McCain votou con George Bush o 90% das veces". McCain, pola súa banda, aparcou a rivalidade por un día e felicitou a Obama pola súa elección como candidato.

45 anos do 'I have a dream'
O discurso do candidato demócrata, titulado Promesa estadounidense, coincidiu co 45 aniversario do mítico discurso I have a Dream de Martin Luther King. Obama recordou o seu traballo nos barrios pobres de Chicago e tivo palabras para a súa avoa. "Eses son os meus heroes", en referencia a esta e mais aos traballadores que sufriron o peche das siderúrxicas da cidade.

O demócrata, ante miles de bandeiras estadounidenses, prometeu restaurar a reputación do país. No entanto, non se estendeu no eido dos asuntos exteriores: recordou que se opuxo dende o principio á guerra de Iraq e anunciou que acabará coa presenza militar neste país "de xeito responsábel". Ademais, dixo que recorrerá á "diplomacia dura e directa" con Rusia no conflito do Cáucaso.