Vieiros

Con bucinas, timbres, pedaleadas e as propias voces dos ciclistas. Estes catro elementos foron suficientes para interpretar a partitura de “La Eine Brise para 111 ciclistas”, do compositor arxentino Mauricio Kagel en Santiago de Compostela. Agora, para aqueles que non puideron asistir, nin como público, nin como brazos executores da propia interpretación musical, xa está no youtube o ensaio e a acción ou performance promovida polo Taller Atlántico Contemporáneo (TAC).

Nesta ocasión, o percorrido dos 111 ciclistas foi duns 200 metros, os que separaran a Igrexa de San Francisco da Praza do Obradoiro, durante os que interpretaron, coa combinación máis ou menos ordenada dos elementos sonoros, a obra de Kagel. Coa actuación, que espertou unha grande expectación, pretendeuse ademais desterrar os tópicos cualificativos cos que acotío se relaciona a música contemporánea, tales como “elitista, fría ou aburrida”. O TAC evidenciou con esta a súa primeira incursión musical que todos podemos participar e gozar coa interpretación dos sons máis clásicos.

Próxima actuación
Outra iniciativa do Taller Atlántico Contemporáneo é o ciclo que a partir desta semana e até finais de ano ofreceranos a posibilidade de achegarnos ao repertorio para a formación de ensemble moderno creado por compositores galegos desde o último cuarto do século XX até os nosos días. Será no Centro Galego de Arte Contemporánea (CGAC) de Santiago de Compostela e iniciarase este martes ás oito e media da noite cun concerto no que, por vez primeira, o público terá acceso a unha presentación global do traballo dos nosos creadores.

• Podes acceder aquí a máis información sobre este Ciclo de Concertos de Música Contemporánea (CGAC)
• Galería de Imaxes da Acción fuxidía para 111 ciclistas