Vieiros

O obxectivo é insistir na concienciación cidadá acerca do cambio climático. Nesa arela, o aforro de enerxía é o xeito simbólico de colaborar nesta acción: "A hora do planeta" convida os cidadáns a un apagón a realizar este sábado 27 de marzo entre as 20h30 e as 21h30. A iniciativa está impulsada pola World Wildlife Fund (WWF).

"Os resultados do acordo de Copenhague o pasado mes de decembro foron claramente insuficientes, pero os cidadáns non se renden", expoñen desde WWF, "ante esta situación e como resposta, millóns de persoas participarán na Hora do Planeta 2010, o movemento global contra o cambio climático máis grande da historia". "Demostra que o poder é teu e actúa", animan.

Tamén o 'No Tech Day'
Con vocación menos comprometida celébrase por outro lado estoutra convocatoria: o No Tech Day, unha xornada convocada tamén para este sábado. Os seus promotores convidan a avaliar o grao de dependencia que os cidadáns teñen dos novos trebellos tecnolóxicos. Xa que logo, animan a prescindir durante 24 horas seguidas de televisión, teléfono móbil, computador, reprodutor de mp3 e calquera outro tareco. Ao cabo do día poden compartir a experiencia na web.