Vieiros

A entrada do gaseiro 'Ibérica Knutsen' na ría de Ferrol, acontecida esta fin de semana, orixinou que o coordinador do Comité Cidadán de Emerxencia (CCE), Manuel Rodríguez Carballeira, se achegase ao xulgado de garda para presentar denuncia polo incumprimento da normativa vixente.

Recordan desde o CCE que se trata dun buque con capacidade de 173 mil m3, e subliñan que o máximo permitido é de 140 mil m3, segundo estabelece a cláusula 2ª da Resolución da Dirección Xeral de Política Enerxética e Minas, de 13 de febreiro de 2004, pola que se aprobou o proxecto de execución das instalacións da Planta de Recepción, Almacenamento e Regasificación de GNL, presentada por Reganosa. O CCE xa presentara solicitude ao Ministerio de Industria para que, previamente, impedise a entrada na ría deste buque. Agora, a denuncia é presentada directamente contra o capitán do buque 'Ibérica Knutsen', a Dirección Xeral de Política Enerxética e Minas, a Autoridade Portuaria de Ferrol – San Cibrao e os promotores da planta de gas de Reganosa.