Vieiros

"É necesario que falemos todos", insistiu o líder socialista, cualificando o debate sobre o futuro de Caixa Galicia e Caixanova como unha "cuestión de Estado". Na súa opinión, a Xunta non cumpre co seu "labor" de "abrir un espazo de diálogo e opinión" con todas as forzas sociais, políticas e económicas. "Non se dá un escenario de compartir visións en conxunto", reprochou. "Tanto a Xunta como as dúas entidades deben explicar que queren facer e como o van facer", reclamou, confiando en que o escenario de incerteza se aclare coa maior brevidade posíbel.

En opinión de Manuel Vázquez "ninguén" pode tomar unha decisión sobre o futuro das caixas galegas "só". Vázquez pediu partir da coincidencia de "todos" en que as caixas sexan "fortes, solventes e galegas", e advertiu de que "para chegar aí, ninguén pode chegar só". "Nin unha entidade, nin as dúas, nin o Goberno só", insistiu. Ao respecto, censurou que o presidente da Xunta "está a converter unha cuestión de Estado nunha cuestión del" e advertiulle de que "por aí non vai ben". Queixouse o líder dos socialistas de que o futuro das entidades estáse cociñando nun debate "escuro e na trastenda dun goberno", malia que entre as dúas caixas "sustentan o 55% das economías galegas". "Este debate hai que dalo de fronte, con luz e taquígrafos", esixiu.