Vieiros

O empresario lugués Jesús Lence cre que é vítima dunha conspiración. O dono da maior factoría láctea do país asegura “sentirse perseguido” polo Servizo de Protección da Natureza (Seprona) e, máis en concreto, por un dos gardas civís deste departamento. As declaracións teñen lugar despois de este mércores tivese que volver pasar polo xulgado por un presunto delito ecolóxico. A Fiscalía solicita para el tres anos de cadea e unha sanción de 160 mil euros. O caso ten que ver cunha morte masiva de troitas que estaría relacionado coa actividade industrial dunha súa planta en Láncara.

“Eu estou completamente convencido, e así llo dixen ao xuíz, de que hai un axente que nos ten teima e que debe ser porque nos anos 90 gañamos un xuízo onde el tamén era axente instrutor”. Lence sostén que nos últimos trinta anos houbo catro denuncias contra el e que todas foron instruídas “polo mesmo señor”.