Vieiros

Pouco despois das 18 horas deste luns, varias ducias de traballadores das oficinas I+B concentrábanse diante dos servizos centrais do Consorcio Galego de Servizos de Igualdade e Benestar (Compostela). Unha hora despois, armados con pancartas e cintas adhesivas, empapelaron o edificio administrativo con lemas que pedían a rectificación da secretaria xeral de Familia e Benestar, Susana López Abella, e solicitaban que se lles aclarase o seu futuro. Nas fiestras podíanse ver as fotocopias das convocatorias públicas de emprego que desminten as acusacións de “enchufismo” que causaron tanta polémica.

A celeridade con que os cargos políticos ordearon a retirada dos carteis contrasta coas semanas de evasivas á hora de poñer enriba da mesa o futuro dos traballadores. Ás dez da noite, tres horas despois de que acabase a pegada, dous operarios dunha empresa de limpeza de Ames procedían a retirar as fotocopias do DOG e os carteis que demandaban unha rectificación de López Abella.

Mentres, as mobilizacións continúan nas oficinas I+B. Ademais das accións xudiciais contra a secretaria xeral, á que acusan de difamación, que emprendeu a CIG, a batalla dos equipos comarcais tamén se dá con especial intensidade na rede: vídeos en youtube ou un grupo de apoio en facebook, que xa conta con máis de 400 simpatizantes forman parte do pulso entre traballadores e Goberno.