Vieiros

Dous millóns de persoas, segundo a organización, e 1,2 millóns de persoas, segundo a Comunidade de Madrid, secundaron este sábado a manifestación convocada por 42 asociacións civís na capital do Estado en contra o proxecto de Lei do aborto do Executivo de José Luís Rodríguez Zapatero.

Entre o máis de medio cento de representantes do Partido Popular presentes na marcha estaban o ex presidente do goberno José María Aznar; a secretaria xeral do PP, María Dores de Cospedal; o eurodiputado e ex ministro do Interior, Jaime Mayor Oreja; e a presidenta da Comunidade de Madrid, Esperanza Aguirre. Tamén participou o segundo tenente de alcalde do Concello de Sevilla, do PSOE. Ademais, asistiron representantes de varias confesións relixiosas, mais ningún bispo.

Pasadas as 17.00 horas, os milleiros de manifestantes comezaron a súa marcha desde a Puerta del Sol con destino á Puerta de Alcalá. A calor e o xentío foron os causantes de boa parte do máis de medio cento de atencións sanitarias, a maioría por mareos e baixadas de tensión.

Os participantes, tras dúas pancartas coas lendas 'Cada vida importa' -portada polos representantes das 42 asociacións convocantes, co presidente do Foro Español da Familia (FEF), Benigno Blanco, á cabeza- e 'Mujeres contra el aborto' -que levaban as xornalistas Cristina López Schlichting, Isabel San Sebastián, Isabel Durán, María Pelayo e María López, fundadoras da plataforma do mesmo nome, entre outras- tardaron unha hora en chegar ao final.

Os asistentes levaban carteis coas lendas 'Zapatero: Tu madre dijo si', 'No al aborto. Tengo 11 hijos', 'Mamá tengo muchas ganas de abrazarte' -pronunciado por un feto--, 'Aborto exterminio silencioso: Goberno culpable', 'Viva la madre que te parió' ou 'Paremos el holocausto del siglo XXI'. Os mozos e as mozas de 16 anos eran os que máis cantaban e berraban.

Bandeiras españolas, bandeiras co logotipo da manifestación e bandeiras vermellas de Dereito a Vivir (DAV) deron cor á marcha, xunto a globos vermellos e grandes pelotas DAV que pasaban de persoa en persoa, globos doutras cores de diversas asociacións e globos de helio amarelo que serviron para elevar a pancarta xigante co lema 'Cada vida importa' (de 60 por 20 metros).

Moitos dos convocados vestían as camisetas oficiais da manifestación, que adquiriran previamente a tres euros (prezo de custo). Tamén houbo quen acudiu disfrazado, como un mozo que se vestiu e pintou a cara de negro e portaba un cartel que dicía: 'No caigas en el lado oscuro'. Ademais, as organizacións repartiron diverso material das súas asociacións entre o público, por exemplo os 'Bebés-Aído', boneco que representa un feto de 12 semanas.

Para financiar a marcha, que custou arredor de 130 mil euros, os voluntarios pasaron 500 petos entre os manifestantes e continuamente animaban desde a megafonía a facer donativos dun euro mandando unha mensaxe de móbil ao 7745 coa palabra 'VIDA'.

As pancartas de cabeceira chegaron sobre as 18.00 horas á Plaza de la Independencia, onde soaban cancións como 'Life is life' (Opus), 'Viva la vida' (Coldplay) ou 'Revolución' (Amaral) a un forte volume grazas os 30 mil vatios de potencia.

Logo de tomar a palabra o xornalista da Cadena 100 Javi Nieves, presentador do acto, que asegurou que é "a maior manifestación da historia de España", dirixiuse ao público o actor Eduardo Verástegui, que explicou o papel principal que ten o home no aborto. Entón celebrouse un acto en recordo das "vítimas do aborto". A música dun violoncello ambientaba o momento, e cinco mil globos brancos voaron sobre as cabezas dos asistentes.

As xornalistas López Schlichting, Durán e San Sebastián leron o manifesto. As asociacións convocantes pedíronlle ao goberno español a retirada do Proxecto de Lei que estabelecerá o aborto libre as primeiras 14 semanas do embarazo. Durante a lectura, algúns manifestantes berraron "Zapatero dimisión, Zapatero dimisión".

A xuízo dos organizadores, a nova lei "privará á muller do seu dereito á maternidade", "non fará nada por evitar abortos e medrará cuantitativamente o inmenso fracaso que é sempre un aborto provocado".

Pasadas as 19.00 horas, Benigno Blanco pechou o acto en nome de todas as asociacións convocantes da plataforma 'Cada vida importa', pedíndolles aos políticos que escoiten "o clamor da rúa" sobre a nova Lei do Aborto. "O dereito á vida é demasiado importante. Tedes que protexelo. Unha sociedade sa e humana non pode convivir cunha lei permisiva do aborto, nin coa actual, nin coa anunciada, nin con ningunha", dixo.

Máis información:

• El Mundo: Clamor masivo en Madrid contra el aborto
• El País: El PP se suma por fin a la protesta
• ABC: Marea humana contra el aborto
• Público: La vieja guardia de Aznar se manifiesta contra el aborto
• La Razón: Marcha por la vida