Vieiros

Os orzamentos galegos de 2008 xa están liquidados. Galiza, gobernada entón polo bipartito, foi a comunidade na que se incorreu nun menor déficit de todo o Estado, cun 0,17%. Deste xeito, o Goberno está exento agora de presentar ante Madrid ningún plan económico-financeiro de reequilibrio, cousa que si terán que facer 10 comunidades autónomas que se saltaron o limiar de déficit autorizado polo goberno estatal (0,75%). No seu conxunto, o saldo negativo das autonomías chega até o 1,5% do PIB, o que dificultará, por outra parte as contas e previsións para 2009 e 2010.

O Goberno quere endebedarse máis
Este balance foi presentado no Consello de Política Fiscal, onde tamén se acordou estabelecer o límite do déficit para 2010 no 2,5% do PIB. Ao Goberno este teito parécelle "un abuso", e así o destacou a conselleira de Facenda, Marta Fernández Currás, quen adiantou o desexo da Xunta de ampliar a súa capacidade de endebedamento.

Este limiar, que anteriormente fora criticado polos populares españois por consideralo excesivo, significa que Galiza poderá dispoñer duns 1.300 millóns extras para os orzamentos do vindeiro ano. A Xunta xa tiña en previsión recorrer ao financiamento externo por este importe, aproveitando ao máximo o teito legal ofrecido polo Estado, mais tal e como están as previsións, agora superaría este máximo porque o goberno español obriga ás comunidades a que inclúan tamén como débeda nos orzamentos a devolución ao Estado dos fondos entregados de máis correspondentes ao exercicio 2008.

En termos exactos, isto significaría que Galiza debe, a efectos contábeis, computar como débeda outros 600 millóns de euros que ten que reintegrar ao Estado en 2011. Se sumamos esta cantidade, as contas superarían a marxe permitida do 2,5 até o 3,6 do PIB, o que se traduciría nun incumprimento do obxectivo de estabilidade e obrigaría á Xunta a elaborar, para o vindeiro exercicio, un plan de reequilibrio financeiro no que explique como pensa volver ao déficit cero nun prazo de tres anos.

E o endebedamento do Estado?
Outra das críticas do Goberno ao modelo formulado polo Estado Español obedece ao reparto de responsabilidades orzamentarias. Para a conselleira, non é lóxico que o limiar de endebedamento para o Estado se sitúe no 5,4%, máis do dobre do que se ofrece a Galiza.

Entende que é unha "incoherencia", cando son as comunidades autónomas as que soportan a maior presión de gasto en servizos, un custe aínda máis elevado en tempos de crise. Tal é así que, co modelo proposto, "mentres o Estado ten máis capacidade de endebedamento para pagar subsidios, son as autonomías as que carecen de recursos para a sanidade, a educación ou dependencia".