Vieiros

Os viaxeiros saben que para achegarse á cultura dun país e palpar o seu ritmo vital é imprescindíbel visitar os seus mercados populares. E iso fai a coprodución galega '¿Qué culpa ten o tomate?', que xunta sete directores iberoamericanos para filmar a vida de sete mercados dos seus países. A longametraxe documental estréase o vindeiro 5 de novembro no MoMA (Museum of Modern Art) de Nova York.

O documental de creación colectiva está producido por Tic Tac Producciones (Galiza) e Lagarto Cine (Arxentina). O realizador galego Jorge Coira dirixiu a parte do filme que se achega á praza de Abastos de Santiago de Compostela. Comparte a dirección con outros seis directores que filmaron mercados dos seus países: Alejo Hoijman (Arxentina), Marcos Loayza (Bolivia), Paola Vieira (Brasil), Carolina Navas (Colombia), Josué Mendez (Perú) e Alejandra Szeplaki (Venezuela).