Vieiros

O Goberno pasa factura. Segundo a conselleira de Sanidade, Pilar Farjas, o bipartito deixou non “caixón” case 20 mil solicitudes de citas médicas en especialidades como oftalmoloxía, traumatoloxía, reumatoloxía ou xinecoloxía. Segundo a conselleira, as anteriores autoridades sanitarias deixaron persoas “que nunca existiron nas listas oficiais e que quedaron fóra para evitar engordar os tempos” nos listados que publicitaba o Sergas.

Farjas deu a coñecer a existencia destes listados logo de que o BNG se interesase polo modo que se confeccionan as listas de espera e como se trasladan logo os datos nas comunicacións oficiais. A nacionalista Ana Luísa Bouza recriminoulle á conselleira que leve catro meses de parálise dedicándose a auditar.

A conselleira subliñou que se están a revisar os rendementos cirúrxicos e asistenciais de cada dentro para “reducir os tempos de espera de diagnóstico e de tratamento e, por outro, potenciar a cirurxía ambulatoria e priorizar as intervencións das doenzas máis graves”.

O PSdeG afirma que hai doentes con cancro que levan dende marzo esperando
“Só me falta pedilo de xeonllos”, exclamou o socialista Modesto Pose, que denunciou que hai casos de cidadáns que están sen atender dende marzo a pesar de que teñen “cancros e tumores”.

O PPdeG rexeitou unha proposición non de lei presentada por socialistas e nacionalistas e que solicitaba que se retomasen as actividades sanitarias extraordinarias debido ao “intolerábel” aumento do tempo de espera.