Vieiros

A xornada no Parlamento transcorreu segundo o previsto. A renovación dos membros do Consello de Contas, composto por cinco persoas que se elixen para seis anos, culminouse coa incorporación dos candidatos do PSdeG, Ramón Xosé Núñez, e do PPdeG, Xosé Antonio Orza. Así, os nacionalistas deixarán de ter representación neste órgano fiscalizador, cousa que si sucedería de aplicarse na votación un sistema de proporcionalidade directa, tal e como defendía o BNG.

Porén, a aplicación da Lei D'Hondt deparou a elección con 60 votos do ex conselleiro de Economía con Manuel Fraga Xosé Antonio Orza, e do profesor de Economía Aplicada na Universidade da Coruña, Ramón Núñez Gamallo. Así, populares e socialistas escenificaron o seu pacto para a renovación do Consello e defenderon o "cumprimento estrito" e a "normalidade" do procedemento. Ao remate da xornada, este órgano queda composto por tres representantes elixidos a proposta do PpdeG e dous do PSdeG.

Acusacións de pacto ilexítimo
O BNG, malia recoñecer a lexitimidade do acordo entre populares e socialistas, lamentou ser "excluído" do Consello de Contas. O seu portavoz, Carlos Aymerich, denunciou o pacto, que cualificou de ilexítimo e defendeu que aos nacionalistas lles correspondía un posto neste órgano polo sistema de proporcionalidade puro.

De todos os xeitos, Aymerich dixo agardar que esta decisión "non inflúa" na actividade fiscalizadora do Consello, que ten pendente avaliar a xestión do bipartito. Pola súa parte, o portavoz popular, Manuel Ruiz Rivas, recordou que na votación se cumpriu o regulamento e subliñou que o seu grupo "deu cumprimento ás normas en base á responsabilidade". Esa tese foi referendada polo voceiro socialista, Xaquín Fernández Leiceaga, quen destacou a "solvencia e rigor" do proceso seguido na votación.