Vieiros

O presidente da Xunta, Alberto Núñez Feijóoo, utilizará o acordo unánime do Parlamento galego en materia de financiamento autonómico como "guía da negociación" que manterá este martes en Compostela co vicepresidente terceiro do goberno español e ministro de Política Territorial, Manuel Chaves.

Fontes do Executivo galego consultadas avanzaron que o presidente galego o conta co "precedente" da xuntanza entre Chaves e o presidente de Cataluña, José Montilla, tras a cal o ex dirixente da Xunta de Andalucía sinalou que esta comunidade "tería que mellorar substancialmente o seu financiamento". Por isto, Feijoo advertirá que é necesario "garantir a solidariedade interterritorial" e, nesta liña, incidirá en que Galiza "non quere máis que os demais, pero tampouco menos". En todo caso, confía en que, no seu primeiro encontro oficial co vicepresidente terceiro, este sexa "sensíbel" ás "peculiaridades e necesidades" do noso país.

Neste sentido, as fontes consultadas apuntaron que Galiza ten renda "baixa" e unha "alta" dispersión da súa poboación, tamén moi envellecida. Os partidos con representación parlamentaria alcanzaron o consenso para reclamar maior peso tamén á orografía e ao custo dunha lingua propia. Ademais, co mesmo obxectivo de limar diferenzas sobre a reforma do sistema de financiamento autonómico, o presidente galego viaxará este mércores a Madrid, para reunirse coa vicepresidenta económica, Elena Salgado.