Vieiros

• Análise das propostas de PP, PSOE e BNG durante a última campaña: Consenso posíbel en financiamento, visións contrapostas con Boloña

O compromiso para a elaboración dunha Lei Galega de Universidades foi o asunto máis destacado da xuntanza coa que, este venres, comparecía por vez primeira o conselleiro de Educación, Xesús Vázquez, no Consello Galego de Universidades.

Durante a reunión con este órgano consultivo, Vázquez anunciou a intención do seu equipo de darlle resposta a esta promesa realizada polo PP durante a campaña electoral cara ao 1 de marzo. Un chanzo na procura de regular o sistema universitario do país "neste proceso de adaptación do noso ensino superior ao Espazo Europeo de Educación Superior" que, segundo subliñou Vázquez, debera servir de canle para a consolidación do Sistema Universitario Galego neste século XXI "de xeito que teña un destacado papel na introdución da sociedade do coñecemento, piar do desenvolvemento económico de Galiza".

A pedra do financiamento
Así e todo, a consellaría evita polo de agora estabelecer un calendario para este proceso. O conselleiro sinalou que o Goberno "enfróntase a unha etapa economicamente moi difícil, a pesar da cal temos a idea de conquerir para as universidades galegas as maiores garantías de éxito".

"Haberá que procurar que os estudantes conten cos recursos e o financiamento necesario que lles permita competir en calidade e excelencia docente e investigadoras coas restantes universidades, tanto españolas como europeas e nun ámbito global", indicou Xesús Vázquez. O titular de Educación comprometeuse neste contexto a elaborar un novo plan de financiamento, "de acordo coas tres universidades". "Un novo plan que permita cumprir coas esixencias derivadas da plan integración ao Espazo Europeo de Educación Superior, pero que aínda non ten datas estabelecidas", admitiu.