Vieiros

A presidenta do Parlamento, Pilar Rojo, comunicou este venres a decisión acordada pola Mesa do Parlamento segundo a cal a investidura do líder do PPdeG, Alberto Núñez Feijoo, como presidente da Xunta, terá lugar entre os días 14 e 16.

O martes 14, Feijoo fará a súa intervención parlamentaria como candidato á presidencia da Xunta. Logo de 24 horas de reflexión, será quenda dos voceiros dos grupos parlamentarios da oposición, Xaquín Fernández Leiceaga (PSdeG) e Carlos Aymerich (BNG). A continuación realizarase a votación na que Feijoo, cos 38 votos dos deputados do grupo parlamentario do PpdeG, será elixido presidente da Xunta. Formalmente, a investidura completarase coa comunicación do nomeamento ao xefe do Estado Español e a publicación do nomeamento, o sábado 18, no Diario Oficial de Galicia. Será daquela cando se produza a toma de posesión.