Vieiros

O goberno que dirixe José Luís Rodríguez Zapatero comunicou por escrito a súa decisión de rexeitar a iniciativa de Xosé Manuel Pérez Bouza, senador do BNG. Pérez Bouza pedía ao executivo compensacións económicas e fiscais para institucións que contribúen na loita contra o cambio climático. Referíase aos montes en mancomún ou as Uxfor, e falaba en nome do parlamento galego, que o pasado 25 de Xuño aprobou por unanimidade unha proposición non de lei, instando á Xunta a pedir compensacións económicas e fiscais para estas entidades asociativas.

Na súa resposta, o goberno indicou que o actual marco tributario do imposto de sociedades "contén bastantes medidas fiscais específicas" a prol da xestión sostíbel dos montes. No que se refire aos impostos especiais, a administración estatal indicou que "non semella que as compensacións fiscais" para primar a repoboación podan ser aplicadas "mediante beneficios" neses mesmos impostos.

O senador nacionalista afirmou que "non é de recibo" o rexeitamento que a proposta sufriu por parte do goberno español. Pérez Bouza criticou que non se teña en conta a importancia dos montes galegos na absorción de dióxido de carbono, xa que reteñen o 21% do que se acumula nas árbores de todo o estado, ademais de outros gases causantes do efecto invernadoiro. Asemade, anunciou que levará ao senado unha moción para que todos os grupos podan manifestar claramente as súas posturas sobre o tema de debate.