Vieiros

Os dereitos lingüísticos dos galegofalantes nos cuarteis, comisarías e dependencias da Garda Civil e da Policía Nacional están garantidos. Así o considera a Secretaría Xeral de Política Lingüística, que na resposta a unha pregunta parlamentar do BNG sobre este tema, asegura estar "moi satisfeita" neste eido. Ademais, na resposta di "ter constancia do máximo compromiso dos corpos e forzas de seguridade do Estado co proceso de normalización da lingua galega".

A pregunta dos nacionalistas referíase á situación dos dereitos lingüísticos das persoas que falan galego nas dependencias policiais e á imposibilidade de facer sinxelos trámites como denuncias, consultas na web ou a xestión do pasaporte en galego. Política Lingüística, pola súa parte, atribúe estes problemas existentes na actualidade ao feito de que "o proceso de normalización aínda está en marcha" e asegura que, unha vez concluído, estas circunstancias desaparecerán.

Doutra banda, o departamento da Xunta subliña os avances dos corpos policiais do Estado no eido da normalización, tal como as campañas En galego, con toda seguridade ou a difusión de relatos policiais na publicación Contos de agardar.