Vieiros

A pasada fin de semana dous taekwondistas galegos subiron ao podio no Mundial Universitario, que se desenvolveu en Belgrado (Serbia).

A primeira das dúas medallas de prata que gañaron os galegos foi para Estefanía Hernández (da categoría de -59 quilos e representante da UNED), que chegou á final vencendo á canadense Carla Bacco, a serbia Tamara Gorjup e á holandesa Louz Deborah. No último enfrontamento a galega perdeu contra a chinesa Pei-Hua Tseng, mais pechou un ano completo no que, ademais do subcampionato do Mundo, tamén gañou o Estatal Universitario e obtivo unha medalla de ouro no Europeo.

A outra medalla de prata no Mundial Universitario de Taekwondo foi para Bruno García (representante da Universidade de Vigo), un mozo que adestra no Centro de Tecnificación Deportiva de Pontevedra (CGTD), e que só perdeu na final de -62 quilos contra o coreano Min-Wook Jeong, despois de superar aos representantes de Casaquistán, EUA e Francia.