Vieiros

Aproximadamente dentro dun ano xa poderá entrar en funcionamento esta tecnoloxía mediante a cal as autoridades poderán advertir aos cidadáns da chegada dun tsunami ás costas. O sistema, que recibe o nome de Sistema de Alerta Precoz de Tsunamis para o Atlántico Nordeste, Mediterráneo e mares conexos (NEAMTWS), está a ser estudado estes días en Lisboa.

Se os traballos continúan co ritmo previsto, no vindeiro ano este sistema debería permitir que as autoridades consigan avisar ás poboacións costeiras cando menos 30 minutos antes da chegada das primeiras ondas á costa. O ano 2011 será a data na que este sistema comece a funcionar en pleno, permitindo alertar en menos de dez minutos despois da xeración do maremoto. Este sistema funcionará en rede as 24 horas do día, e contará con centros en cada un dos 23 países que están actualmente implicados.

O proxecto, que se está a debater estes días en Lisboa, segue avanzando baixo ao coordinación do Comité Português para a Comissão Oceanográfica (COI) e deberá ser aprobado en decembro no consello de ministros da presidencia portuguesa da Unión Europea.