Vieiros

No acto de entrega, na mañá deste martes 25 de setembro, estiveron a conselleira de Cultura e Deporte, Ánxela Bugallo, o director xeral de Patrimonio Cultural, Felipe Arias, e o alcalde de Fisterra, José Manuel Traba.

Grazas a este recoñecemento, a nosa "fin do mundo" pode obter unha serie de beneficios sociais e económicos. Para isto, a Consellaría levará adiante unha serie de medidas para a conservación e divulgación da área: a igrexa de Santa María das Areas, declarada Ben de Interese Cultural, será restaurada cun orzamento de 325.000 €, e no seu exterior acondicionarase unha área de recepción de visitantes cun punto de información e un aparcadoiro, ademais de beirarrúas e bancos.

Un lavado de cara para "o santo da barba dourada"

Tamén están a resolverse os trámites para restaurar a imaxe do Santo Cristo de Fisterra, ademais da limpeza do conxunto arqueolóxico e etnográfico de San Guillerme (os restos da antiga capela e do sartego, as chamadas Pedras Santas).

Outras accións previstas son a construción dun mirador, a limpeza e acondicionamento do camiño do cemiterio pola costa, a recuperación xeral de camiños e de vexetación e a instalación de sinais informativos, ademais da eliminación das antenas de telecomunicación.

Finis terrae

A fin do mundo, á que, segundo a lenda, chegaron as tropas de Décimo Xuño o Bruto logo de atravesaren Gallaecia, onde aínda hoxe seguen chegando os peregrinos e romeiros que aínda continúan despois de Compostela. Unha das portas do alén. A casa da Orca Vella, perdida polo Monte Facho. A terra do Ara Solis, ou do culto o sol alá onde morre, ou o lugar onde fica a cidade asolagada de Dugium.

Son unha chea de lendas, pagás a maioría e cristianizadas outras, que arrodean o extremo máis occidental de Europa. O seu carácter estremeiro convérteo nunha referencia mitolóxica en varias culturas europeas.