Vieiros

Do mesmo xeito que Monforte ten "o seu castelo ou o río Cabe", Galiza ten o seu idioma para "sentírmonos orgullosos" no medio dun "mundo globalizado", segundo expresou este xoves o voceiro nacional do BNG durante o seu mitin nesta vila luguesa. No único concello lugués onde o BNG ostenta a alcaldía, Anxo Quintana ironizou co baleiro nun acto recente do PP na mesma localidade. "Tiñan pouca xente e botáronlle a culpa ao Real Madrid", comentou, engandindo que "para gañarlles non cómpre o Real Madrid, xa está Severino Rodríguez", subliñou referíndose ao alcalde e candidato do BNG.

Quintana afirmou que "por fin Lugo será a primeira en algo", salientando a apertura dunha rede de Galescolas que convertirá a provincia na de mellor cobertura en ensino infantil de todo o Estado. "Xa era hora", dixo, "poden estar todos contentos, menos os do PP, que prefiren que Lugo siga á cola de todo". Durante a súa intervención, Quintana acusou o líder do PPdeG de dicir "burrada tras burrada" nesta campaña, reprochándolle que lle "faltan as ideas".