Vieiros

Lanzar un Clúster que defenda os intereses das compañías galegas de tecnoloxías da información (TIC). Ese é obxectivo dunha reunión celebrada o venres en Santiago de Compostela.

A patronal tecnolóxica vive no minifundio, dende o punto de vista asociativo, pois conviven varias asociacións con fins semellantes. Neste contexto, a creación dun Clúster suporía un avance significativo, sobre todo para competir fóra de Galiza.

E é que, segundo datos do Plano Estratéxico Galego da Sociedade da Información , as empresas dependen nun 80% do mercado galego, sobre todo de clientes públicos. A penas se factura fóra do Estado un 5%.

Entidades involucradas
Na xuntanza participaron o presidente de AETIC (Asociación de Empresas de Electrónica, Tecnoloxías da Información e Telecomunicacións), Ramón Lois; a presidenta e coordinadora de EGANET (Empresas Galegas Adicadas a Internet), Beatriz Legeren e María Xosé Jamardo, respectivamente; o presidente e director xeral de INEO (Asociación Multisectorial de Novas Tecnoloxías da Información e a Comunicación), Jorge Cebreiros e Manuel Soliño, respectivamente; así como os representantes de AEIG (Asociación de Enxeñeiros de Informática de Galicia) e AETG (Asociación de Enxeñeiros de Telecomunicación de Galicia), Juan Otero e Ricardo Fernández, respectivamente.

A Consellería de Innovación, promotora da iniciativa, estima que a comezos de xullo organizarase unha asemblea constituínte do Clúster. Polo de agora hai dúas propostas de organigrama, unha do goberno e outro da AETIC.