Vieiros

Os veciños das Encrobas, en Cerceda, están fartos de aturar o pó dos camións de carbón que se dirixen á térmica Meirama. Dende hai anos, as poucas familias que quedan nas inmediacións do complexo industrial denuncian que a actividade da empresa impide levar unha vida normal. Os veciños dirixíronse en innumerábeis ocasións á empresa e mesmo ás autoridades políticas e xudiciais para explicaren o seu problema. Porén, só houbo promesas.

O pasado venres, os afectados, moitos deles xa maiores, decidiron impedir o tránsito dos camións. Tamén retiveron a tres técnicos da central que se achegaron á zona. Para liberalos, esixian que se persoase no lugar o encargado da central térmica. Logo de horas de discusión, os veciños deixaron marchar os empregados que durante o tempo de retención beberon viño e comeron chourizos cos afectados.

Ata seis anos de cadea
Aínda que ningún dos retidos presentou denuncia, a Garda Civil, que desprazou ata o lugar a numerosos efectivos, anuncia que vai presentar un informe diante do Xulgado de Ordes. Segundo informa El Correo Gallego, a denuncia vaise rexistrar esta mesma semana. Os veciños poden ser acusados dun delito de "detención ilegal", que está penado con sancións de ata seis anos de cadea.