Vieiros

A senadora demócrata estadounidense Hillary Clinton anunciou este sábado a súa intención de formar parte da carreira presidencial cara ás próximas eleccións do 2008. Cun sinxelo "I´m in" (estou dentro), a senadora por Nova York e ex primeira dama do país anunciou na súa web a súa aposta por "renovar a promesa dos Estados Unidos" logo de "seis anos de George W. Bush". Na mensaxe, asegura que abrirá o diálogo para procurar "un fin apropiado á guerra en Iraq e restaurar o respecto polos Estados Unidos en todo o mundo". De gañar as primarias, Clinton converteríase na primeira muller candidata á presidencia do país. Outro dato: o binomio de apelidos Clinton-Bush podería chegar a mandar en Washington durante un total de 27 anos (1989-2016).