Vieiros

Tanto adultos coma nenos poderán participar nas aulas didácticas que o Festival pon en marcha nesta edición. Mestres coma Sergio Cobos, Nacho Muñoz, Xurxo Troncoso ou Pili Araújo achegarán aos asistentes unha visión da música que vai máis alá da asistencia aos concertos ou á feira de artesanía. Estes obradoiros valerán para completar a oferta folque de Ortigueira.

Desde as 12 da mañá do sábado poderase gozar da composición á improvisación por ordenador, que impartirá o produtor galego de Mercedes Peón, Uxía, Budiño, Ecléctica Ensemble..., entre outros, Nacho Muñoz. Ademais, Sergio Cobos presentará o obradoiro Baile galego de creación. 7 pasos igual a infinito. Antes do xantar, terá o seu espazo a Construción de instrumentos populares. Introducción á percusión popular, que terá como mestre o percusionista, creador de distintos grupos de percusión de rua e músico da Opera off, Xurxo Troncoso.

Xa pola tarde e a partir das 6, a aula Pandeireta. Unha interpretación reelaborada correrá a cargo do colaborador de Manuel Budiño, exalumno do CMTF de Lalín e membro de Ecléctica Ensemble, Davide Salvado, ademais do Baile galego de creación. 7 pasos igual a infinito que volverá impartir un dos bailarins mais solicitados do panorama folque galego e colaborador habitual da banda Berrogüetto, Sergio Cobos.

Volven os Cantos do mundo con Pili Araújo, especialista en cantos do mundo, coordinadora da Aula Folque Infantil de Pontevedra e productora do CMTF, Da composición á improvisación por ordenador que levará Nacho Muñoz e a Construción de instrumentos populares. Introducción á percusión popular que impartirá de novo Xurxo Troncoso. Como novidade, o Festival ofrece a Conferencia-audición comentada As culturas musicais em Galiza, que impartirá Ramom Pinheiro no Teatro de Ortigueira.

O ponente desta conferecia será Ramom Pinheiro, produtor artístico de Ouvirmos, profesor de Historia da Música galega no CMTF e co-director do Postgrado en Música tradicional da USC. Para poder formalizar a matrícula, os interesados deberán dirixirse a web@festivaldeortigueira.com nos próximos días.