Vieiros

Os filmes gañadores de Cans 2006 foron, na categoría de mellor curta de ficción, Mario Iglesias por "Nais". Diego Méndez logrou o da mellor curta de animación por "Os 2 lados da valla". O público decantouse por "Quérote mal" en ficción e "O señor dos mosquis" en animación. O mellor actor foi, segundo o xurado, Ricardo de Barreiro polo seu papel en "Bos días" e o premio de de mellor actriz compartírono Isabel Rey e Isabel Naveira por "Nais" e "Quérote mal", respectivamente. Os filmes gañadores proxectaranse de novo mañá no Bar Liceum, acto co que se dá por pechada a terceira edición de Cans.

As 10 curtas participantes no concurso proxectáronse en tres alpendres, dúas adegas e unha vella casa abandonada . A estas salas de visionado hai que sumar a incorporación deste ano, o "jalpón friki", de entrada libre e que fixero posíbel unha asistencia de máis de 1.000 persoas o sábado e no total dos festival "calculamos que máis de 2.000", segundo recolle no seu blog a asociación cultual Arela, organizadora do festival xunto co concello do Porriño e outras entidades. O total de entradas vendidas foi o dobre que o ano anterior, o que fixo 480 "butacas".

Cans 2006 desenvolveuse baixo a coordenación do guionista Alfonso Pato e como curiosidade, dicir que os asistentes, directores e actores foron trasladados nos chimpibuses, ou tractores pequenos protagonistas do agro galego, nos que, ademais, se celebraron xogos malabares. Outras das actividades coas que contou o festival foron a música de Andy Chango, dos Tres Tristes Tigres, dos Festicultores e do que fora líder de Los Enemigos, Josele Santiago, acompañado do músico vigués Pablo Novoa.