Vieiros

O I Congreso da Memoria, celebrado en Narón, xa lle pediu aos concellos que fosen retirando das prazas, rúas e edificios públicos os símbolos franquistas. No último Congreso do PSOE tamén se adoptou unha resolución no mesmo sentido. A Lei 33/1981 daba un prazo de tres anos para a retirada dos escudos franquistas.

Pero na entrada principal de María Pita aínda hai unha vidreira co escudo da ditadura, o tristemente célebre polo fritido. A mesma representación atordoa a memoria na fachada do cuartel de Atocha ou Correos. "En total son máis de 40 puntos esparexidos por toda a cidade; toda a nómina de xenerais africanistas, Sanjurjo, José Antonio... ou o hospital Juan Canalejo. Por non falar da estatua de Millán Astray, claro", di Amigo.

Recentemente, os membros da APA da escola primaria Raquel Camacho pediron a retirada do escudo franquista da entrada do colexio. Denegáronlla.

Os agravios de Vázquez

A CRMH da Coruña lembra que PP e PSOE xa rexeitaron en dúas ocasións as mocións do BNG para que se retirase o recoñecemento a Franco -do 10 de outubro de 1936- como Fillo adoptivo e predilectísimo da cidade da Coruña. E reiteran a mensaxe dunha "auténtica vergoña para a nosa cidade".

Pídenlle a Zapatero que actúe como presidente do Goberno para que se cumpra a lexislación vixente, e para que o goberno municipal da Coruña "siga as liñas de actuación que ten o seu partido noutros concellos de Galiza e España".

No mesmo documento rexistrado o xoves na Delegación do Goberno, esixen a destitución de Vázquez como presidente da Federación Española de Municipios e Provincias (FEMP) "se continúa con esta actitude de defensa e conservación da simboloxía franquista".

"Aquí, ou estamos coa ele a voltas, ou coa bandeira española máis grande de España, ou coa simboloxía franquista", di Amigo.

"Anque tampouco somos ilusos", matiza. "Pode que lle tiren un pouco das orellas no Congreso Federal, pero até que cambie o goberno municipal...".