Vieiros

'A Astérix o ceo cáelle na cabeza' é o trixésimoterceiro volume da serie deste pequeno galo da Bretaña que resiste (aínda agora) a colonización romana. A historia, que só a partir de hoxe se desvela, narra a invasión da aldeíña gala por uns sedutores extraterrestres con fasquía de iconas pop estadounidenses, no que será o primeiro contacto do personaxe coa ciencia-ficción (apócema máxica fóra). Albert Uderzo, o seu debuxante e o creador que segue vivo (René Goscinny, o guionista, faleceu en 1977), sinalara na súa presentación o que xa se sabía: hai romanos, menhires, e unha paparota final, elementos claves nos álbumes deste pequeno heroe.

Nas súas moitas viaxes ao longo e largo do planeta, nin Astérix nin o seu inseparábel Obélix visitaron Galiza. Ademais, non están traducidos ao galego nin sequera a terceira parte dos álbumes, malia que comezara o traballo en 1977 o poeta Eduardo Blanco-Amor, nunhas versións xa inatopábeis da 'Liorta dos xefes' ou 'Astérix o galo'. A Mesa pola Normalización Lingüística púxose en contacto coa empresa posuidora dos dereitos no estado, Salvat-Bruño, para coñecer cales eran os plans para esta tradución. A editorial catalá asegurou que non estaba prevista a edición en galego de 'A Astérix o ceo cáelle na cabeza'. Por iso A Mesa pola Normalización anunciou que está a cavilar medidas ao respecto, e non descarta unha campaña de boicot aos libros da editorial, fundamentalmente dirixidos ao ensino.

A tiraxe inicial é de 8.000.000 de exemplares en 27 estados do mundo e media ducia de linguas, dos que o 40% se dsitribuirán en Francia. Algo que contrasta cos 6.000 exemplares en francés que vendeu a primeira edición de 'Astérix o galo', o primeiro dos volumes. O total de exemplares vendidos supera os 300 millóns, traducidos a 107 linguas. A tradución ao catalán houbo de ser retirada dos quioscos e librarías só unhas horas despois de que se puxera á venda, co que seguramente se convirta nun obxecto de coleccionista. Dúas graves grallas ortográficas no título (El cel s'ens cae al damunt, que vén sendo O ceo se nos cae na cabeza) foron as responsábeis.

Por outra parte, o sábado é o día da presentación mundial de 'Harry Potter e o príncipe misterioso', a tradución portuguesa de 'Harry Potter and the Half-Blood prince', a sexta entrega do neno mago. Aínda non está confirmado cando aparecerá traducido ao portugués de Brasil (unha versión sempre moi distinta). En galego agárdase a publicación do cuarto volume, 'Harry Poter e o cáliz de fogo' para finais de ano.