Vieiros

A misa celebrábase todos os 20-N dende 1976 na parroquia de Santa María de Beade. Pero este ano o alcalde decidiu suspendela a mediados da semana pasada, argumentando que non ía poder estar na vila por andar de viaxe. O pequeno concello de Beade (600 habitantes) está rexido dende a ditadura por Senén Pousa, que tamén gañou nos últimos comicios municipais cun 72% dos votos e seis de sete concelleiros. É o concello quen paga o custo da misa todos os 20-N, e a rúa principal da localidade chámase Rúa do Caudillo.

E aínda que non ía haber misa, unha cincuentena de militantes de AMI concentrouse na localidade para protestar pola cerimonia. O templo estaba custodiado pola Garda Civil e pechado. Os manifestantes despregaron diante del unha pancarta onde se lía '20-N: Fascismo nunca máis' e comezaron unha manifestación ata a Casa do Concello. Durante a manifestación producíronse enfrontamentos cos veciños, co resultado dun coche crocado e co parabrisas roto, e rematou coa queima dunha bandeira española preconstitucional.