Vieiros

Eurovisión estrea novo sistema de semifinal e final. Na final, os dez países mellor clasificados na edición anterior (Riga) e os catro que máis euros achegan: Francia, Alemaña, Reino Unido e España. Na semifinal, o resto: 22 países, dos que dez pasarán á final. Entre eles está Andorra, que participa por primeira vez levando o catalán a Eurovisión, e Portugal.

Marta Roure fai equilibrios diplomáticos: representa a Andorra, pero conta co apoio dos medios de comunicación cataláns. De feito TV3 organizou, canda a televisión andorrana, o proceso de selección da candidata, e que foi retransmitido polas dúas cadeas. Ademais, o sistema de televoto implica que os espectadores cataláns poderán votar por ela, aínda que non os andorranos. O voto por móbil estará aberto para os dous grupos de países, tanto para a semifinal como para a final.

Ademais, Marta Roure competirá en catalán con 'Jugarem a estimar-nos', e non en inglés, xusto cando o principal idioma do mundo domina nos repertorios de 27 dos 36 países participantes. Mesmo o país menos occidentalizado do continente, Albania, que tamén participa por primeira vez, cantará en inglés. Tamén se estrean Bielorrusia e Serbia e Montenegro. Sofia Vitória representará a Portugal e cantará en portugués: 'Foi magia'.